O Museo das Peregrinacións achega o Camiño a través da novela histórica

Compostela mergullarase a próxima semana na máquina do tempo a través da literatura co Camiño como fío condutor. Farao a través do ciclo Santiago, historias dun Camiño prodixioso, que se desenvolverá desde o luns 27 ata o xoves 30 no Museo das Peregrinacións no marco dos actos do 70 aniversario da entidade. A actividade consiste nunha serie de conferencias dedicadas á ruta xacobea desde a Historia e a novela histórica, que contará con escritores do xénero e autores de best sellers relacionados coa temática xacobea. Participarán Isabel San Sebastián -que tamén se encarga da dirección desta proposta-, Antonio Pérez Henares, Juan Eslava Galán e Emilio Lara.

O ciclo está organizado pola Asociación Escritores con la Historia e conta co patrocinio da Xunta de Galicia. A xornalista e escritora Isabel San Sebastián (Santiago de Chile, 1959) será a encargada de alzar o pano coa charla titulada «Alfonso II, o primeiro peregrino». Será a partir das 19.00 horas -todas comezarán no mesmo horario-, no auditorio do Museo e con entrada libre e gratuíta ata completar o aforo. San Sebastián profundou nos seus últimos libros na temática xacobea. En La peregrina relata a aventura que deu orixe ao primeiro Camiño de Santiago e con el obtivo o Premio Internacional Pentafinium Jacobeo de Literatura. No 2018, explicaba que elixira o Camiño de Santiago como escenario porque «es una aventura fascinante, quizás es la aventura más fascinante y perdurable que ha acontecido en la historia de España. Es la mayor autopista cultural, artística y espiritual de Europa, y, probablemente, del mundo». En setembro do ano pasado vía a luz Las campanas de Santiago, que ten nas súas referencias a Compostela de finais do século X. Na presentación desa obra, a xornalista e escritora explicaba a La Voz de Galicia que a chegada de Almanzor a Santiago pareceulle «un episodio apasionante para novelar. Simboliza la historia de la Reconquista». Entón tamén resaltaba que a novela histórica era a fusión perfecta entre historia e literatura, apuntando que a historia permitía coñecer mellor o presente.

Ao día seguinte, o martes, será a quenda no ciclo do tamén escritor e xornalista Antonio Pérez Henares (Guadalaxara, 1953) coa conferencia «Os cabaleiros de Santiago». O presidente da Asociación Escritores con la Historia aborda na súa última novela do xénero, Cabeza de vaca, a figura do conquistador español que cruzou a pé Florida ata o Pacífico e México.

O terceiro en participar nas xornadas, o mércores 29, será o autor de obras como o Premio Planeta En busca del Unicornio, Juan Eslava Galán (Arjona, 1948). O escritor dun cento de libros, principalmente novelas e ensaios históricos, impartirá a charla «Os meus Camiños de Santiago». Eslava Galán fixo a súa tese doutoral sobre historia medieval e a rebelión de los Irmandiños. A súa aposta é levar a historia ata a xente que non le libros de historia pero que ten a curiosidade para demandar textos alternativos. Cre que o rigor e a amenidade non teñen que estar rifados. Desa base parte no seu coñecido traballo Historia de España contada para escépticos. O peche do ciclo correrá a cargo de Emilio Lara (Xaén, 1938) coa charla titulada «O Camiño e a aventura de Europa». Lara é doutor en Antropoloxía e profesor de Xeografía e Historia. Na súa traxectoria literaria publicou catro novelas e logrou numerosos premios.

---

---