As obras do proxecto «O amante do papel» nunca foron expostas
14 may 2022 . Actualizado a las 18:19 h.O Centro Cultural Marcos Valcárcel inaugura esta tarde (20.00 horas) unha exposición única no seu xénero. O amante do papel. Cartografía dunha colección de gravado é unha mostra de orixinais datados entre os séculos XV e XX que nunca ata o de agora foron amosados en público e que forman parte dunha colección privada galega que conta con máis de 2.000 orixinais. A comisaria do proxecto que se poderá ver en Ourense, Rosario Sarmiento, referiuse ao fondo como «unha das coleccións de gravados máis importante de España e as pezas escollidas buscan crear un percorrido polos fondos da mesma» e agradeceu ao propietario das obras —a identidade do mesmo non se deu a coñecer— por ceder os orixinais que forman parte do proxecto.
De Durero y Rembrandt a Tápies
En total son corenta e tres as pezas que forman O amante do papel. Cartografía dunha colección de gravado e na exposición inclúense gravados, debuxos ou litrografías de artistas como Pablo Picasso, Rembrandt, Alberto Durero, Marc Chagall, Rubens, Toulouse-Lautrec, Salvador Dalí, Tápies, R. R. Penck, Giuseppe Vasi, Hans Hartung, J. Friedläender, Jorge Castillo, L. Von Hofman, Max Ernst, Oscar Kokoschka, Piero Dorazio, Piranesi y Wifredo Lam.
A exposición está artellada de xeito cronolóxico e temático, buscando reflectir na mesma os grandes nomes da historia da arte para facer un percorrido pola mesma. Nos eixes temáticos destacou Rosario Sarmiento a presenza dende as pezas máis vencelladas ao mundo da relixión —Durero, Rembrandt— ás que teñen como motivo a arquitectura ou as vencelladas ao Art Nouveau, á abstracción ou ao surrealismo. Na selección das corenta e tres pezas que forman O amante do papel «o abano de artistas é impresionante», segundo sinalou Sarmiento. No catálogo, a responsable da mostra fai un percorrido pola situación do coleccionismo en Galicia e pola evolución do mesmo. Dende os tempos en que era case inexistente aos anos 80 e a recuperación da democracia, escenario no que se deu «un proceso de normalización cultural no que a posta en marcha de novas institucións educativas e de centros de arte, xunto a unha maior profesionalización do sector e o impulso do coleccionismo público e privado, propiciarán unha modernidade e conexión cultural e artística co contexto internacional».
Do Renacemento aos Beatles
O director do Marcos Valcárcel e o vicepresidente segundo da Deputación, Francisco González e César Fernández respectivamente, coincidiron á hora de agradecer á comisaria o ter pensado no espazo expositivo ourensá para mostrar a colección e na coincidencia no mesmo das exposicións de gravados, a de The Beatles e a do proxecto de recuperación do coche Alpinche.