Venta de entradas para o concerto especial do Culturgal 2022

Alfredo López Penide
L. Penide PONTEVEDRA / LA VOZ

VEN A GALICIA

RAMON LEIRO

Culturgal programa en Pontevedra un festival coa presenza de Antía Muíño, Néboa, Grande Amore e Berto

27 oct 2022 . Actualizado a las 17:54 h.

Dende este xoves, 27 de outubro, xa se poden mercar as entradas para o concerto especial do Culturgal 2022, que terá como protagonistas a Antía Muíño, Néboa, Berto e Grande Amore. «Catro propostas, catro talentos, que chegarán a feira como un furacán para celebrar os 15 anos de Culturgal. Electrónica, pop e tradición; a diversidade da música galega de hoxe nunha sesión única e singular», destacaron dende a organización. As entradas poden mercarse en cultur.gal a un prezo de 8 euros que inclúe, ademais do concerto, o acceso á feira.

O certo é que unha das novidades desta edición do Culturgal será #CulturgalSon15, unha proposta de AGEM (Asociación Galega de Empresas Musicais) que reunirá boa parte do novo talento musical do país. Este festival será o 26 de novembro, a partires das 20 horas, no auditorio do Pazo da Cultura.

RAMON LEIRO

Así, contarase coa presenza de Antía Muíño, cuxo tema Carta aberta ten mais de 900.000 reproducións contabilizadas en Spotify e ven de gañar o Premio Martín Códax da Música 2022 como Artista Emerxente, pero tamén con outros dous premiados nesta festa da música galega. Por unha banda, Néboa, que obtivo o galardón na categoría Pop e Indie cunha «proposta baseada no coñecemento da música alternativa e a sensibilidade pola instrumentación da música tradicional», e, por outra, Grande Amore, que pechará o #CulturgalSon15 despois de levarse para a casa o Martín Códax de Electrónica e apostando por un poxecto sorprendente e cargado de personalidade.

E entre medias, Berto, unha proposta que naceu en decembro do 2021 da man de Alberto Mira, músico e compositor pontevedrés que xa alterara o panorama musical galego co grupo Verto. En marzo deste ano, publicou Bailar Chikito.