Patrocinado por

Un ano para descubrir O Salnés en galego

Rosa Estévez
rosa estévez VILAGARCÍA / LA VOZ

VEN A GALICIA

Martina Miser

O equipo de Normalización Lingüística do IES Castro Alobre vén de editar un almanaque que percorre as marabillas da nosa bisbarra

22 dic 2022 . Actualizado a las 05:00 h.

Non ten boa cara o enfermo. Todas as análises e pescudas realizadas coinciden no mesmo: o galego esmorece. Disque a cura é ben sinxela: basta con lle dar á lingua, abonda con falar Pero algo aparentemente tan sinxelo resulta ser, en realidade, sumamente complexo. Ben o saben os integrantes do equipo de Normalización e Dinamización Lingüística do instituto Castro Alobre, en Vilagarcía, que levan anos traballando na promoción da lingua entre o seu alumnado. Seguirán co seu empeño no 2023. Un ano que no centro se rexerá —como é habitual— polo almanaque elaborado pola rapazada. Un calendario que fala galego e que, desta volta, lévanos de viaxe por «lugares máxicos da contorna».

O de facer un almanaque é un dos proxectos que o Equipo de Normalización desenvolve dende hai máis anos. Desta volta, propuxéronlle ao alumnado que escollese os lugares da bisbarra do Salnés que fosen do seu gusto e que se retratasen neles, tentando mesturarse co entorno. O resultado é unha pequena colección de xoias, empezando pola portada na que Mateo, un alumno de segundo de Bacharelato, aparece de escorzo, vestido como se fose un emigrante galego a piques de marchar e que mira, imaxinamos que con pesar, á escultura que del se despide dende O Cavadelo.

«A xente participa. É certo que hai que motivala, que hai que recordarllo e insistirlle un pouco, pero acaban implicándose», sinala Pepe Torres, vice director do centro e coordinador accidental do grupo de Normalización e Dinamización do instituto. Así que ata a súa mesa chegaron un bo feixe de imaxes entre as que se seleccionaron as gañadoras: a portada, unha por mes e algunhas máis para ilustrar a primeira páxina. Canda elas aparecen, como cada ano, refráns galegos. «Tentamos non repetirnos», sinala Pepe. Aínda hai máis información neste almanaque comprometido: por unha banda, nel veñen marcadas as datas importantes para o centro, e uns códigos QR que permiten acceder de forma rápida e sinxela a información sobre os lugares que aparecen retratado, auténticas marabillas deste Salnés noso.

O departamento de normalización e dinamización do Castro Alobre caracterízase polo seu dinamismo. Vilagarcía non é un contexto fácil para o galego, «vémolo nas aulas, o número de galegofalantes é mínimo», explica Pepe. Malia todo, o grupo de docentes implicados neste proxecto é grande e nel hai mestres de diversas disciplinas: son unha peza fundamental na loita pola supervivencia que esta a librar a nosa lingua.

O equipo traballa cun obxectivo claro: conseguir que a rapazada non vexa o galego «como un idioma de segunda que non vale para determinadas cousas». Por iso, poñen todo o seu empeño na organización de actos, como a semana da ciencia en galego, nos que achegan ao alumnado a investigadores e científicos que falan nun idioma que esmorece.