Patrocinado por

Os maios xa están aquí con flores e música para encher as rúas de Vilagarcía, Cambados e O Grove

b. c. VILAGARCÍA / LA VOZ

VEN A GALICIA

Martina Miser

Colexios, asociacións e particulares participan nesta cita coa tradición

28 abr 2023 . Actualizado a las 22:07 h.

Chega maio e con el a tradición dos maios que enche de flores e música as vilas. Na comarca hai tres prazas que nunca fallan a esta cita e na primavera do 2023 non ían ser menos. Os máis madrugadores foron os cambadeses, onde este venres xa sacaron os maios á rúa da man dos escolares do municipio e dos usuarios dos centros de día do pobo. Foi a primeira entrega dunha festa na que o Concello repartirá 2.450 euros en premios e que mañá sábado vive o seu segundo asalto cun novo desfile desde a praza do Concello, ás 18 horas, en dirección ao parque de Torrado, onde terán lugar as actuacións e a exposición de máis maios.

Festa dos Maios celebrada este venres no parque de Torrado en Cambados
Festa dos Maios celebrada este venres no parque de Torrado en Cambados Martina Miser

En Vilagarcía e O Grove agardarán ao día 1, o luns, para sacar o maio á rúa. Na cidade arousá esta tradición está máis que consolidada tal e como demostra o feito de que haxa 22 participantes e 57 maios no concurso que se celebrará no Parque Miguel Hernández a partir das 11.30 horas.  Alí estarán, como en anos anteriores, as ANPA, asociacións, particulares e a residencia de anciás Divina Pastora cos seus maios artísticos e cónicos, as caixas, as cruces e os barcos.

O certame non ten carácter competitivo, senón de exhibición, polo que todos os participantes recibirán un premio consistente nunha compensación económica e rosca. As contías oscilan entre os 150 e os 40 euros en función da categoría na que se participe, se o fan con copla ou sen ela e do número de participantes.  En total, e coa inscrición xa pechada, a Concellería de Cultura destina 4.800 euros a financiar un evento que busca conservar e potenciar a tradición popular galega.

No Grove a festa será na Praza do Corgo a partir das doce do mediodía e hai máis de 700 euros en xogo para os maios tradicionais, os artísticos e as coplas que concorren a concurso. Só participar tamén ten premio: 30 euros.